ህዳር 18/2018ዓ.ም አዲስ አበባ፣

በተባበሩት መንግስታት የአፍሪካ ኢኮኖሚ ኮሚሽን የአፍሪካ ስታቲስቲክስ ማዕከል ዋና ዳይሬክተር ሚስተር ሳሙኤል ኮቢና አኒማ የኢትዮጵያ ስታቲስቲክስ አገልግሎት ዋና መስሪያ ቤትን ጎበኙ።

ለዋና ዳይሬክተሩ ኢትዮጵያዊ ባህልን የጠበቀ አቀባበል ያደረጉት የኢትዮጵያ ስታቲስቲክስ አገልግሎት ዋና ዳይሬክተር ክቡር ዶ/ር በከር ሻሌ ዳይሬክተሩ ተቋማቸውን በመጎብኘታቸው የተሰማቸውን ደስታና ክብር የገለፁ ሲሆን በተዘጋጀው የአቀባበል ፕሮግራም ላይ ተቋሙ ባለፉት ሶስት ዓመታት የቀጣይ ጊዜን ሀገራዊ የስታቲስቲክስ መረጃ አቅርቦትን በተሟላ ሁኔታ ለመመለስ የሚያስችል የስታቲስቲክስ ዲጂታላይዜሽን ላይ ትኩረቱን ያደረገ ተቋማዊ ሪፎርም ተግባራዊ እያደረገ እንደሚገኝ አስረድተው ፤ እንደተቋም በአጠረ ጊዜ በሀገሪቱ የስታቲስቲክስ ዘርፍ የልህቀት ማዕከል ለመሆን ያለውን ራዕይ ለማሳካት የአፍሪካ ስታቲስቲክስ ተቋማት የዘርፉን ዕውቀት፣ ልምድና ቴክኖሎጂ የሚጋሩበትና የሚደጋገፉበትን አስቻይ ሁኔታ መፍጠር አስፈላጊ በመሆኑ በዘርፉ ያለውን የሰው ሀይል አቅም ግንባታ፣ ልምድ ልውውጥና የቴክኖሎጂ ሽግግር ለማከናወን የሚታየውን የፋይናንስና የቅንጅት እጥረት ለመፍታት ከማዕከሉ ጋር ለመስራት ያላቸውን ፍላጎት ገልፀዋል።

የማዕከሉ ዋና ዳይሬክተር ሚስተር ሳሙኤል ኮቢና የኢትዮጵያ ስታቲስቲክስ አገልግሎት የአሁንና የቀጣይ ጊዜ ስታቲስቲክስ መረጃ ፍላጎት ለመመለስ የሚያስችሉትን የሜቶዶሎጂ ማዘመን፣ ቴክኖሎጂን የመጠቀም እንዲሁም ምቹ የስራ አካባቢ መፍጠር ላይ ትኩረት አድርጎ የሰራቸውን የሪፎርም ስራዎች በአህጉሪቱ ላሉት ተመሳሳይ ተቋማት እንደሮልሞዴል የሚታይ መሆኑን ገልፀው ማዕከላቸው ተቋሙ እያከናወነ የሚገኘውን ውጤታማ የሪፎርም ተግባራት ቀጣይነት እንዲኖራቸው በሁሉም መስክ አስፈላጊውን ድጋፍ እንደሚያደርግ ገልፀው በተቋሙ ለተደረገላቸው ወንድማዊ አቀባበል ምስጋናቸውን አቅርበዋል።

ዋና ዳይሬክተሩ በተቋሙ ቆይታቸው በዋና መስሪያ ቤት የተሰሩት ምቹ የስራ ከባቢ፣ የቴክኖሎጂ መሰረተ ልማትና የስልጠና ማዕከልየጎበኙ ሲሆን በተጨማሪም የተቋሙን አሁናዊና ቀጣይ የትኩረት አቅጣጫዎች ላይ በተቋሙ የስታቲስቲክስ ዲጂታላይዜሽን ዘርፍ ምክትል ዋና ዳይሬክተር ክብርት ዶ/ር ሜሮን ክፈለው ገለፃ ቀርቦ ግንዛቤ እንዲያገኙ ተደርጓል።